Минатата недела во Охрид, Куманово и Тетово се одржаа три групни јавни перформанси против говорот на омраза, кои беа наградени на конкурсот „Со креативност и младински активизам против говорот на омраза”, што го организираше „Безомразно.мк“.

Средношколци од гимназијата „Св. Климент Охридски“, на плоштадот во Охрид го одиграа „Рибиниот танц“, и на присутните граѓани им испратија порака против омразата и насилството.

Во кумановското основно училиште „11 Октомври“, за време на големиот одмор се одигра училишниот перформанс “Заедно против говорот на омраза”. Настанот го организираше Центарот за меѓукултурен дијалог од Куманово, во соработка со повеќе волонтери од градот.

Третиот перформанс „Turning Point/Пресвртница” се одржа во близина на плоштадот во Тетово, а за реализацијата се погрижија волонтерите од Центарот за балканска соработка “ЛОЈА”.

Tие пред граѓаните демонстрираа како омразата може да ги повреди луѓето и како треба да и се спротивставиме.

Серијалот на групни јавни перформанси продолжува во Битола, Скопје и Струмица, а екипата на „Безомразно.мк“ подготвува видео материјали за сите настани.