Бројните графити со навредливи содржини претставуваат вистински предизвик за соживотот во Тетово. Исполнети со говор на омраза, најчесто на етничка основа, тие ја искривуваат вистинската смисла на графитите, како уметност и култура на живеење преку која младите на креативен начин ги изразуваат своите ставови и пораки.

Неодамна учениците од тетовската Гимназија се вклучија во акцијата за отстранување на навредливите графити од јавните објекти и урбаната опрема во градот.  Од различна возраст и етничка припадност, средношколците од овој град им порачаа на своите сограѓани, но и на целата јавност дека младите треба да се спротивстават на сите форми и содржини кои поттикнуваат меѓуетничка нетрпеливост и поделеност.

Акцијата е дел од проектот што го спроведуваат Одделот за превенција на Секторот за внатрешни работи Тетово и локалната самоуправа, со поддршка на ОБСЕ. Учесниците во проектот ја искажаа својата поддршка и им порачаа на младите својата креативна енергија и уметнички пориви, како и своите лични и групни ставови кон одредени општествени теми и процеси да ги искажуваат на поинаков начин и со други форми и содржини.

Видео прилог на ТВ Менада од Тетово

Додека некои графитите ги сметаат за вандализам, други на тоа гледаат како на уметност. Графитите може да поттикнуваат на омраза, но и на љубов. Токму тоа го прикажува фото-приказната за скопските графити, објавена пред неколку месеци од безомразната герила.